【地道式劇透】《人中之龍6 生命詩篇。》最終章-罪無可逭者
December 13, 2016 Share

【地道式劇透】《人中之龍6 生命詩篇。》最終章-罪無可逭者

續上回,講到「尾道的秘密」經由桐生一馬探索之下正式對外曝光,而來栖猛呢個朵都即將要消失於江湖之中。

來栖猛事敗後想聯絡大道寺,但個仔已經隔離等左呢一刻好耐,因為佢可以一次過接收巖見兵三既野,包括來栖猛呢個朵。

而「尾道的秘密」早係40年前佢已經知道,當時係一個姓松永既幹部講佢知,希望佢幫手求情留活口,不過佢最後當然死係廣瀨手下。

而佢老豆出左黎行咁耐,當「尾道的秘密」一旦曝光,佢真係跳樓都唔掂,畢竟好多勾結野都會一次過曝光,而巖見恒雄就可以利用呢一點同大道寺定立新既約定。

不過係殺老豆之前,巖見恒雄都問點解唔可以講「尾道的秘密」比佢知,佢老豆希望佢唔會踩隻腳入黑道,畢竟知道「尾道的秘密」就呢一世都要係黑道上打滾,巖見兵三希望佢繼承造船所,光明磊落咁做人,但可惜巖見恒雄背後既「白澤」紋身同佢勾結東城會既功績足以擔任陽銘聯合會既繼承人。

**白澤紋身象徵德行高的統治者治世,正好符合黑白兩道通吃的巖見恒雄。

其後小清水按巖見恒雄既指示開槍處決左巖見兵三,巖見恒雄都立馬搵大道寺,希望全權接收巖見兵三既一切,包括來栖猛呢個朵,不過先要條件係要將令「尾道的秘密」曝光既桐生一馬解決。

另一邊,廣瀨一家都換上黑服,為廣瀨徹打理身後事,不過即使廣瀨老爹係殺死佢地親父既兇手,但佢地都無產生過仇恨,畢竟老爹都「手下留情」,無下到最終狠手而殺死晒佢地。

期間,神出鬼沒既染谷有事相約桐生到海邊見面,一黎當然就話來栖猛自殺一事好可疑,其次仲講出佢40年就已經知道左「尾道的秘密」,而佢表明其實想解決菅井呢條老野直接坐正,畢竟大吾依家比佢搞到坐緊監。

但可惜巖見恒雄同菅井條死老野係同一陣線,桐生一馬同廣瀨一家都比人落左格殺令,當然,係到出現既染谷本身搵桐生既目的都係收到菅井既指示而要殺死佢,但既然佢提醒桐生咁多野,證明佢都係為東城會著想,同桐生有住共同既敵人,不過佢話晒都咁好心提醒遙需要再換個地方避下,唯有返去廣瀨一家知會聲。

返到廣瀨一家之後,當然馬上打個電話叫勇太搵伊達做野,畢竟遙依家身體慢慢好轉緊,一步都唔可以有差池,其後,陽銘聯合會既人就黎到,仲出動埋火箭炮炸屋,真係惡死……搞決完佢地之後就係自由時間,可以係神室町同廣島出入,而時間帶都可以轉換,想做支線先就慢慢做啦。

一到左神室町,南雲就即時扮起大佬格,話唔可以邊行邊食煙,可能比桐生話過一次,依家扮晒款咁話返人,點都好,最後再到醫院一轉,畢竟遙醒返係有野要同佢傾下。

桐生一見到遙,當然好似老豆咁話想教訓佢一獲,但最緊要當然係依家見到佢恢復健康,其後秋山都到左,桐生都出去打電話比染谷,免得暫時阻到兩個年青人談心。

染谷都好誠實咁將自己知道既野講野比桐生知,不過佢質問返桐生係咪想破戒,畢竟桐生真係一直保持無殺人紀錄而令人尊敬……但佢最後強調,如果要捉住菅井就最好搵多幾條友幫手,唔係佢會走得甩。

唔洗問,桐生當然係搵勇太同秋山,話去新瑟雷娜集合,大家搞掂好就可以出發,不過秋山一開始係比桐生要求照顧遙同遙人,主要係唔想佢捲入格殺令既戰鬥當中,但秋山就話呢個係還拖既大好機會,畢竟佢原本間野都係因為菅井既關係逼住收檔。

最後桐生當然都同遙講聲,會令勇太平安咁返黎,點都唔會令遙人無左個老豆,搞掂準備好身上既補給品就可以進入新瑟雷娜,開始漫長既戰鬥。

六個著住黑服既男人,霸氣咁殺入千禧塔,當中又有唔少敵人用槍,要小心留意,當然,打到越後,你身邊既戰友就會留低幫你頂住啲人,而勇太條友唔帶死亡筆記係身又亂咁衝搞到開門比人插左一刀,死就應該死唔去既,不過就要秋山留低照顧佢咁啦。

而一條友走到咁上下,就會有架死人直昇機追住你,得閒就用火神機槍掃你咁,扣好多血,所以記得盡量搵掩護,當有用火箭炮既敵人就可以出兩次極射爆部直昇機,從而過關。桐生:我用火箭炮射爆直昇機只係令佢撤退,槍手一定無死到!

過五關斬六將之後,桐生就接到一個電話,係菅井好臭串咁話自己已經走甩左,不過就安排左一個人係會見佢,唔通就係背部有紋身既最終大佬?不過當然唔係啦……

菅井好串咁睇住直播,睇桐生同人打,自己係到食花生,因為等緊佢既人就係染谷!但今次染谷好似有必殺之心咁出埋刀,出手攻擊桐生既時候仲表明自己已經痴左線,點都好,或者佢有苦衷,打左再講。

染谷一開頭有刀係手,要盡量小心,但經過QTE後,就變左得返赤手空拳既對決,而對決過後,巖見恒雄都係螢幕上出現埋。

果然,因為有人質係手,染谷先逼住向桐生出動到殺手,既然染谷唔可以殺死桐生,咁佢就要死,3秒之內唔死就到清美死,而為左清美,染谷拎左一把武士刀,希望桐生了結佢,但桐生要殺既人唔係佢,而係菅井佢地,再講,桐生殺左人咪破戒?所以佢一定唔會殺。

3秒過後,南雲突然入左黎,染谷為左清美,切腹自殺,死之前話自己無打過個女,仲希望南雲可以幫手照顧清美同個女,但小清水都係開左一槍,眼前一黑之後,大家又再返去新瑟雷娜。

南雲提出大家依家應該要分散行動,始終佢都唔想再有人死,而受刀傷既勇太,桐生就希望交由秋山帶去下水道暫時休養。

不過秋山都再強調,如果桐生殺左人破戒,「堂島之龍」呢個朵就唔可以再係神室町立足,但菅井同巖見恒雄真係黑人憎到死,所以真係要下殺手都希望桐生搵佢自己代勞,免得整臭自己個朵。

等大家走晒之後,南雲約左桐生上天台傾,話大約知道菅井同巖見恒雄既所在位置大約係邊,所以決定出發去造船所阻住巖見恒雄成為陽銘聯合會既第二代會長。

最後呢兩位不打不相熟既兄弟決定唔想再牽連到其他人而決定私底下出發,只求大家攬炒同年同月同日死,所以準備好補給同戰鬥力就可以搵南雲準備打最終Boss。

出發之後,一黎就直接係踩到上菅井同巖見恒雄面前,等住大家既敵人就得小清水同一大班雜魚,其實直接解決小清水就可以,之後佢就會以滿血爆氣既狀態再同你打多次,打完當然唔會比你一帆風順,因為打通黑白兩道既巖見恒雄一定有野威脅住桐生。

巖見恒雄一早叫本庄條傻仔直接帶走遙同遙人,但好可惜,本庄呢條大眾臉本來好威威咁有職升,但臨走果陣比黑警開左槍,本來得伊達中槍,最後佢都中埋,所以同主角對著幹既下場真係唔好受。

由於有人質在手,桐生一馬都唔可以還手,比菅井條死老野打左幾野,而巖見恒雄呢條終極大奸角都除衫show紋身,一拳一拳打落去,緊係啦,人地無得還手,仲唔扮下勁咩。

不過無叫埋小弟黎真係明智之舉,因為咁樣佢地先可以從後偷襲咁救返遙同遙人,搶先偷跑既事成日都有就唔好咁計較啦~

既然依家人質已經無事,桐生一馬既怒火當然都到左極點,繼之前話要所有人都要活住離開之後,依家當然就係絕對唔會比奸人活住離開啦,於是唔好講咁多,除衫show紋身,開拖!

準第二代陽銘聯合會既會長巖見恒雄好中二咁除左佢副眼鏡,但都唔代表勁,佢最叻都只係捉住你硬打幾拳,小心比佢捉住,多禁X作脫離同閃避就可以,反正佢唔似小清水咁要打兩次,當然啦,佢都係識爆氣既,小心為上就解決到佢。

戰敗既巖見恒雄就好似喪家犬咁比桐生慢慢打,不過死老野菅井仲可以用槍黎射遙,而呢個時候,勇太一盡老豆既責任,希望以肉身保護兩母子,不過真男人桐生一馬已經搶先捱左一槍,其後仲捱多幾槍,可見父愛係幾偉大。

而菅井知道自己一定唔可以活得過今日,最後用手上既手槍自盡,慳返要殺佢既功夫,大道寺既心跳都停埋,最後戰爭就咁樣落幕……相信大家都擔心各人既下落。

先講清美,其實佢無死,畢竟只係以眼前一黑既畫面帶過,因為小清水當時射既係空包彈,所以兩母女最後都可以重聚,當然染谷就真係死左,不過咁,南雲都要好好振作,重建廣瀨一家。

而堂島大吾,真島吾郎,仲有冴島大河都終於出冊,巖見恒雄當然無比桐生打死啦,都只係去左坐監姐,但戰火未完,因為東城會依家可能因為桐生一馬既關係而要同陽銘聯合會開戰,大家都討論緊係咪開戰既好時機,不過桐生一早預計到,所以留左封信比大吾。

信既大約內容係話自己無好好盡「父親」既責任同佢共度親子時間,而只係直接將成個東城會託付比佢,所以無資格自稱係大吾同東城會既「父親」,而佢最後既請求都希望大吾唔好為「父親」去報仇。

所以大吾最後就決定唔會同廣島開戰,仲主動提議同陽銘聯合會舉行五五對分既交盃儀式,即係視大家為兄弟盟一樣。

最後,秋山走去問伊達桐生係咪真係死左,畢竟最後伊達以一個警方同朋友既身份去認屍,但伊達都堅持話桐生已經死左,遺體都極速火化,不過當然唔係咁啦,唔係你爆機之後控制邊個……

事緣係有個自稱大道寺稔既徒弟,又係政治家,比筆巨款桐生,希望佢將成件事保密,以保住大道寺既名聲,但桐生拒絕,反而提出要將堂島大吾放出黎既條件,話唔放返堂島大吾出黎,廣島就真係有場黑道大戰,到時佢救火都救唔掂。

當然,果位政治家一定話桐生區區黑道講咩條件,但桐生又再話唔好激嬲我,因為你知道有咩下場,同埋想講住個秘密會揭穿而過下半世就唔好答應,其後伊達都入左黎。

而桐生第二個條件就係要求用佢既權利黎整一張死亡證明,只要「死」左,咁就唔怕個秘密會揭穿,而在場既伊達就成為左證人,不過就算假死,以後都唔可以見大家,桐生既最終目的只係希望遙同遙人過得平安,呢個都係桐生一馬最後一集做主角既原因。

最後,勇太都去左「牽牛花」,同遙以及遙人一齊生活,但遙人好勁咁見到企係遠處既桐生,當然經典情節係遙都會轉個頭去望埋,但當然咩都望唔到啦。而伊達大叔最後就係咁背負住桐生一馬假死既沈重秘密……

後感:

今集係桐生大叔最後一次做主角,對於淨係玩過呢一集既新手黎講算係唔錯,或者有時得一個戰鬥模式風格都係好事黎,最少你硬打就可以,不過今集就唔可以收埋武器係身,變左想用武器都要係附近執黎一次性咁使用,可能戰鬥上有少少唔方便,不過格鬥遊戲都係拳頭對拳頭好睇啲既。希望之後可以再係外傳遊戲見返桐生大叔!

【《人中之龍6 生命詩篇。》完】