跨世代轉變!《寵物小精靈 太陽/月亮》細數第七世代變化之處!
November 18, 2016 Share

跨世代轉變!《寵物小精靈 太陽/月亮》細數第七世代變化之處!

今日就係《寵物小精靈 太陽/月亮》既正式發售日啦,唔知各位訓練員心情如何呢?無論你心大心細諗緊買唔買好,一或已經準備好一日當上寶座都好,異次猿就專登揀左7點黎講一講,依家就一齊黎睇睇第七世代同以往有咩唔同既地方啦!

再賣賣廣告,小弟開左個細細地既FB討論區,想晒寵問野無任歡迎:

https://www.facebook.com/groups/PokemonSunAndMoonHK/

1.日機可以揀繁中

pk1

XY果陣都係得3隻膚色,今次多左隻仲深色啲既

雖然體驗版出黎果陣已經實證左,不過正式版都要見一次先至會安樂,畢竟今次有官方繁體中文語系揀既話,睇劇情,甚至只係普通NPC既對話都會變得有趣左,順帶一提,同第六世代既XY果陣比,一開始可以揀既膚色多左一種!唔知係咪比各位扮非洲人呢?


2.任務提示更清晰

pk2

如果有得拎野,會提你禁個「A」去攞(其實連釣魚都係比你咁樣係特定位黎釣)

以往玩《寵物小精靈》大家玩到某啲位可能就因為語言關係而卡關,今次除左有繁中比大家清楚理解主線劇情之外,小地圖仲有「紅旗」提示大家而去邊,而去到果個位通常都會自動觸發個劇情,等就算係好耐無玩,甚至第一次接觸既朋友都唔會太難明白之後下一步要做咩。

pk4

跟住「紅旗」去行基本上無咩大問題


3.戰後照料解異常

pk3

戰鬥完緊係要幫木木梟打理下~

「摸摸」加親密度呢個系統係第六世代都已經有,不過戰鬥完即時同小精靈打理一下就今個世代先有,其實除左幫佢拍拍塵之外,最主要可以借呢個系統黎解除剛才戰鬥得黎既狀態異常,但記得戰鬥完望到可以「照料」就禁Y,如果唔係好似我呢啲懶人咁就通常後期都唔理~


4.新增影相位呃Like

pk5

洛托姆相機版本越高,解鎖既功能就越多

如果有玩體驗版既朋友就會記得博士要大家入山洞偷影啲小精靈,到正式版當然又有呢個功能啦,不過影完隻小精靈都唔會衝埋黎攻擊你,影完六張相之後真係可以揀一張黎呃Like,不過係呃遊戲入面既……當人氣度達到一定數值果陣,洛托姆相機就會升級,解鎖更多功能。


5.過場畫面更豐富

pk11

相信係體驗版大家都見過佢……

同樣都係有玩體驗版既朋友細心少少都會留意到NPC講野果陣今代係多左唔少表情同動作,或者可能係視角改變左既關係,多角度既特寫都多左,令到過場畫面都豐富左唔少,對上訓練員都好,輸左既表情都會改變下,雖然作為主角既我地好多位都「Poker Face」,但至少今次對答選項既位其實都多左唔少,等玩家都可以投入其中。

pk6

連過場都問我食唔食,果然吃貨……


6.交通工具輕鬆用

pk15

玩體驗版騎牛騎慣左,到正式版好快又有得比你慢慢騎

以往世代要冒險相信隨身真係要帶住一隻甚至係幾隻既「交通工具」小精靈先得,有時主力寵仲逼迫學秘傳技搞到好似浪費左一個技能格咁,今次呢一代終於可以告別秘傳機,真真正正咁騎小精靈去冒險啦!呢個騎行裝置就會佔左大家個「Y」掣,而原先話無用既十字鍵就隨而代之變左揀交通工具既快捷鍵。順帶一提,今次雖然係4個島,但水位唔多,無水比你潛,相信火岩隊卧底IGN今次應該都會幾滿意……

pk8

劇透少少,噴火龍其實只係代替TM02……而且街位針對性少左


7.掃掃QR捉勁寵

pk9

個剪影就好似以前睇電視咁玩緊「猜猜我是誰」一樣

以前細細個就諗過,如果啲御三家可以野生捉到就好,而今次就真係實現到童年時既夢想……回正題,雖然掃QR code雖然已經唔係咩新鮮事,不過今次掃完肯定就有隻稀有小精靈等住大家,例如附圖隻君主蛇,只要去到佢指定地方就有機會遇到!提提大家,呢個功能係選單另外果頁,名為「QR掃描」

大家今次可以Google搵一堆QR code慢慢掃,掃夠10次之後就利用「島嶼掃描」黎睇下搵到邊隻正野啦~(打緊呢篇野既同時又捉左隻大劍鬼)

pk14

有圖有真相,我真係借呢個系統遇到野生既君主蛇


可能有人會問,唔係有個4P架咩?的確係有,不過我承認有少少玩野想好似佢今個世代啲「Z招式」咁,7個字配7個唔同既新特點咁同大家介紹姐,果個4P戰鬥模式又名「皇家對戰」,係個對戰設施入面,大約主線中段就會接觸到。而另外今次都有個唔錯既入手小精靈機能都會係下一篇主力再介紹,希望大家多多支持~

Share to Facebook