【遊猿搜查線】街機救世主?實地考察《Disney Tsum Tsum》街機版風潮!
April 20, 2016 Share

【遊猿搜查線】街機救世主?實地考察《Disney Tsum Tsum》街機版風潮!

《Disney Tsum Tsum》街機版都幾黎左香港幾日,不過明顯地真係好多人玩,可以話係多左一班平時無入去機舖既人黎玩,例如今日既放工時間都係見唔到有空檔出現,今日我地就去實地考察下,睇睇《Disney Tsum Tsum》街機版既熱潮對機舖文化影響會有幾大,睇下呢個狂熱會唔會增加返多少生氣,始終依家香港啲機舖真係執得一間就少一間咁制。


先睇價格-旺角新之城最貴

單局7蚊、連公仔35蚊。攝於荃灣金禾

單局7蚊、連公仔35蚊,只可以入一蚊同五蚊銀。攝於荃灣金禾

同樣都係單局7蚊、連公仔35蚊。攝於油麻地金星

同樣都係單局7蚊、連公仔35蚊。攝於油麻地金星

t7

單局7……丫唔係,10蚊先岩!不過同另外兩間一樣,連公仔都係35蚊。攝於旺角新之城

時間關係,一共有6間機舖都有《Disney Tsum Tsum》街機版,不過我地就只係去左3間,因為聽朋友口中得知旺角新之城果到單局唔要公仔非常食水深,結果一去實地考察就發現其他人只係所謂既公價7蚊局,而佢就要10蚊一局,當然特別版既e-pass都同要埋公仔就都係公價50蚊同35蚊,不過每局多3蚊積少成多真係差好遠,某程度上真係逼人食左隻公仔咁

而街機版同手機版既《Disney Tsum Tsum》玩法等等係完全無分別,唯一特別既係你可以抽到一個實體公仔用於遊戲之中,不過遊戲之中都只係《Disney Tsum Tsum》街機版,你玩開手機版既都係要努力課金過後先可以抽到係心儀既角色。其實為左實體公仔既,不妨行多幾步去商場慢慢揀,又大隻啲,又可以揀自己鍾意既迪士尼人物,相信熱潮一過,大家都係會拎返起手機繼續玩就算,講真要用成35蚊黎玩一局真係可以話係全場最貴……當然香港人心態,玩一局拎公仔打個卡跟上潮流都係人之常情既事。


再睇格局-土地問題,機鋪逼爆

【荃灣金禾】
t4

格局就真係要每個慢慢講少少,首先講下點解連格局都要講埋,因為呢個《Disney Tsum Tsum》街機版狂熱引左一班人入機舖,或多或少對一班平日入開黎玩既人點都有少少空間上既影響。先講荃灣金禾,左邊係16格(Jubeat),右邊係影貼紙相,對面就係太鼓之達人,但16格同太鼓之達人都幾有人氣,相信岩岩到步既第一日佢地真係面臨「土地問題」,辛苦晒。


【油麻地金星】
t9

到油麻地金星就慘少少,右邊係已經比人遺左既《PAD》街機(仲要無開到機),左邊就係洗衣機(Maimai),洗衣機人氣一向都高,係正隔離其實都幾影響,不過好彩目前就咁睇黎玩既人都唔算多,所以我諗忍一排應該都無乜大影響,預佢一開始個狂熱過左就無事架啦。


【旺角新之城】
t6

最後就係旺角新之城,佢有兩大部,不過有部就面向門口,其實都有少少影響到出入,附近就有高達街機,而佢呢個位都叫幾闊,多人起上黎都叫排到隊,但如果人再多就真係逼爆架啦,整體黎講都幾影響其他落開機舖玩既人,因此我身邊向來落開機舖既朋友都表示頂唔順,呢排都唔會落去玩住,希望真係呢個熱潮過左無咁多人先再落,就算真係作死試下都等遲啲先,因為廢事咁激氣,主要因為跟住再講既文化問題。


最後講文化-唔該想玩下鋪請再排隊

【荃灣金禾】
t5

呢個真係要慢慢講下先得,始終都講過話《Disney Tsum Tsum》街機版黎左香港令好多平時唔係入開機舖既人都入黎「潮聖」(即係跟住個潮流入黎呢個聖地踩下場),但其實機舖都有所謂一套約定俗成既文化,例如大家成日聽到既「放底一蚊跟機」但當然有啲人係唔識規矩,係個銀包拎錢出黎連Coin繼續玩既,當然有人都可能利用「舖銀」表明自己會連玩幾多局咁,但為左決定人流熱潮問題,所以荃灣金禾好醒目咁貼告示話每次最多只可連玩3局,咁就無得嘈。

尼個時候要請表雲哥出黎先得

尼個時候要請青雲哥出黎先得

而最後《Disney Tsum Tsum》街機版雖然令班唔識規矩既人跟風咁去玩,但無可否認叫令機舖增加返啲生氣,雖然《Disney Tsum Tsum》街機版又係一款手遊移植到街機既作品,所以都係算同《PAD》同《怪物彈珠》咁,唔夠原本隻手遊咁抵玩同埋都預左唔會有咁多人係長玩落去,不過或者有堆人係會因為接觸到其他街機而有興趣咁去長玩,始終有時遊戲既野,你唔玩過你係唔知佢會有幾咁好玩!衰啲講,間接令機舖唔會執得咁快,始終某啲街機玩既人真係唔多,例如飛鏢機咁,相信大多數鍾意玩既人都去左酒吧到玩,有時換換血都係好事,所以各位出入開機舖既朋友真係暫時忍讓下啦,可能不久既將來會多左囡囡R搵你打Maimai都未定?