【B+】比白貓仲差緊啲靈活性!《Samurai Rising》短評!
June 3, 2016 Share

【B+】比白貓仲差緊啲靈活性!《Samurai Rising》短評!

大家期待既久既《Samurai Rising》(サムライ ライジング)終於係琴日朝早正式上架啦,唔知各位玩成點呢?而事前登錄獎勵由於係人人有份,所以當你做完教學之後收信就會自動有3000石,建議大家真係靠果3000石黎刷隻心儀角色起手啦,畢竟要儲多1800石黎10連抽反而仲耐……好,廢話唔再講,講下隻GAME先。(題外話:其實呢隻GAME都幾慘下,琴日出完黎就比另一款大作搶過一大半人氣……)

q2

職業多得黎但唔夠特色去平衡

呢隻GAME有11種職業,但得盜賊同弓手少部份攻速比較高既職業係佔優,其餘因為攻速慢而爭取唔到時間攻擊搞到比怪蝦,呢一點好似迫玩家去課金黎裝備自己咁。而且佢屬性我覺得真係多過頭,咁樣要人記住都係一件幾麻煩既事,畢竟除左屬性之外,連怪既種族都可以比你用角色特性去剋埋,又要再煩一餐。除此之外,被視為補師職業既白魔道士及赤魔道士支援性都係比較低,係赤魔道士叫比較正常,相信就算係10連抽都好,大家都未必咁準中齊11個職業。


q3

關卡與素材要求過難

先簡單講下隻GAME個協力系統先,每關都有3個難度,但Normal係唔比協力,而你一定要過左果關先可以打Hard同Extra,當然你過左就可以同人協力,等人Carry你,不過係之前,你就一定要夾硬過左Normal難度,但你角色一唔夠勁就麻煩。至於上圖幫角色升lv用既御魂又可以點黎呢?如果你認為有曜日關卡幫你打就錯啦,你想幫角色升級係要靠打關隨機出黎既地圖先可以針對返相應顏色既御魂黎打,所以呢隻GAME其實好講合作性,最好長期係有班朋友同你一齊分享地圖(岩岩提過可以協),否則你隻角色會升得好慢……


q4

無體力制下亦無分可加

呢隻GAME同樣都係行無體力制,只要你有時間,部機有電,隻角色夠力就可以一直打主線,不過遊戲入面就有樣好似大富翁既系統,基本上回一次骰仔時間都要好耐下,而最大次數就係3次,而擲骰仔可以令到金幣御魂等等好野,不過影響角色強度既道場都要靠運氣踩中先可以升級,當然啦,你都可以選擇用課金道具黎決定你既格數,但咁樣真係令我減左佢印象分。


q5

操作性偏向家用機令人難以上手

呢隻GAME可以比玩家選擇直介面或者橫介面,岩唔同人既口味都算唔錯既,不過操作及設定上就好家用機Feel,因為基本上你既無敵時間就係得碌緊果0.5秒,當然換轉係打緊家用機,你拎住個手掣要習慣性咁碌相信都唔難,但依家係成個平面上,要控制得好就真係唔容易,所以先話攻速快既職業生存到,因為咁強調要快同埋個無敵時間既原因就係因為比怪打到訓低左係無硬直,再慢少少就會比怪屈牆角而死。


q6

戰鬥介面尚算合格

最後就講埋佢畫質,戰鬥介面呢啲小小細節,佢畫質同聲音,相剋特效及敵人攻擊提示等等都算做得唔錯,戰鬥介面配置都清晰易明,有勁角色既人仲可以開自動,地圖都有講清楚邊到有怪,甚至箱既位置係右上角小地圖都好清晰下,比起同類型既遊戲,掛住Square Enix之名都算合格,當然,介面同操作真係兩回事黎!順帶一提,佢裝備稀有度又好似複雜左少少咁,因為先睇星數,後睇顏色,不過算啦,大家睇數值黎著衫就OK。


rr

遊戲畫質
4 out of 5
故事劇情
3.5 out of 5
音樂聲效
2.5 out of 5
耐玩度
3.5 out of 5
中毒性
3.5 out of 5
Overall

總括而言,咁多個職業上其實都做得唔太平衡,遊戲上既傷害判定令某啲職業會處於弱勢,而且屬性多真係唔係一件好事,除此之外操作都仲未夠靈活,不過都值得玩一玩既。

3.4

Average
3.4 out of 5