【B-】又黎中西神魔大集錦!《天空與大地的克羅斯諾亞》短評!
May 13, 2016 Share

【B-】又黎中西神魔大集錦!《天空與大地的克羅斯諾亞》短評!

今次呢隻《天空與大地的克羅斯諾亞》(空と大地のクロスノア)其實就搞緊封測(5月11日至5月16日),咁我就無聊下載埋,既然唔係連左去日本store就下載到既,今次就順便派埋APK比大家啦,不過整體覺得佢玩法幾《七騎士》Feel,又係懶回合制咁得閒出下技,然後主介面又要你飛下左飛下右,係就係幾動感,但我就覺得成件事複雜左,而佢世界觀真係好大下呀,又中又西又有神又有魔咁,有興趣既朋友就自己都試下啦~

s2

四職配戰鬥陣形定位清晰

雖然創角果陣佢就得四個職業,你有四個角色位,鍾意既玩晒四個都得,佢有鬥士、魔法師、牧師同埋殺手,一個明顯係坦,另一個係魔法輸出,仲有一個係後援補血,最後當然係玩速度暴擊,配合返佢遊戲入面另一個叫陣形系統基本上可以再同其他四名抽或者打返黎既角色可以好好配合,不過唯獨戰鬥真係比較單調,令我都係自動打住咁去。


s3

角色有原創都有集合中西天地神魔界

老實講,佢呢隻GAME個世界觀可以話大到痴線,似乎佢想出乜角色就出乜角色,圖中既劍鬼鳳炎係故事原創既,但服部半藏呀,咩孫悟空,甚麼趙雲我諗大家都識,但世界觀咁大,我諗佢後期要抽到重複角色都幾難,對有興趣玩收藏遊戲既朋友或者係好,但我個人認為佢到後期會好昆水下,因為劇透埋比大家知,佢係星座神都有埋,不過變左係戰鬥出得一發果種支援類角色。


s4

又係好中國式既進化系統

呢隻GAME表面上就係Aiming既,但底子裡就係騰訊,所以佢先咁重中國味,例如第一關已經叫西遊等等,最顯得中國特色重都係呢類塞零件既進化系統,打主線打齊晒6件就可以進化,幫佢加品質,加夠一定品質學到新技能,而角色下面果個就係收集夠碎片用黎升星用既,真係好有中國特色,就算變成日本遊戲都係改唔甩……先扣一分壓壓驚。


s5

戰鬥系統仍舊簡單

佢其實係屬於戰略型遊戲黎,角色夠速度就會自己打人,基本上平日打任務都係加速自動就得,最多換下目標咁,畫質算係唔錯,但戰鬥系統我嫌佢真係太簡單,基本上邊個圖案著左燈咪禁落去開囉,打到後期真係好易悶,同埋我幫其他角色學完技都好似又係禁個角色圖案自己出鬼左佢,無論PVP定打其他野都係咁,係佢個畫質叫做合格。


s6

遊戲系統及關卡過份繁複

其實佢遊戲入面既系統真係由你打主線同升lv先慢慢陰啲陰啲咁強制性入教學mode開放比你,但我打到第5章,發現佢真係好鬼多活動比你打,但我地有無咁既時間同精神去磨晒佢先?因為我相信睇緊呢篇野既朋友唔會只係玩一隻手遊咁少掛?同埋成日推推下主線比佢捉左入教學Mode比佢強制介紹新野真係好煩,而佢主介面我前言都提左,一頁係唔夠,你向右掃有兩頁,左掃又一頁,向上掃都可以整頁PVP比你,知你世界觀又大又靚啦,但咁多野真係好繁亂下。


 

s7

佢做任務果頁真係成個地球咁,好鬼多野比你準備去打

s8

畫面係幾靚下既,但有唔少野令佢扣左分

s9

雖然我都話玩到第5章,但我諗佢啲野太多,我都未必試晒,得罪講句可能佢係協力都無

遊戲畫質
3.5 out of 5
故事劇情
3 out of 5
音樂聲效
2.5 out of 5
耐玩度
3 out of 5
中毒性
2 out of 5
Overall

總括而言,佢衰在有一陣大陸味,然而佢一開始就差唔多乜神都出齊黎,其實去到後期都差唔多會悶,就算打打下主線推你出黎同你介紹新系統都咁話。

2.8

Average
2.8 out of 5